Hytaýly alymlar hakyky "kowumdaşlaryny" synlamak üçin robot antilopany ýabany tebigata iberdiler. Barlagçylar adam görse diýseň ürkýän haýwanlary doly tebigy şertlerde synlamak kararyna geldiler diýip, “Sinhua” habarlar gullugy habar berýär.
Synag Hytaýyň Ylymlar akademiýasy we DEEP Robotics bilen bilelikde Sinhaý-Tibet daglygyndaky Kekeksili platosynda ýerleşen Hoh-Sil goraghanasynda geçirildi.
Robot hakyky antilopa gaty meňzeýär, tüýüniň reňki we beden gurluşy hem hakyka laýyk gelýär, ýöne onuň gözüniň golaýynda kiçijik gizlin kamera bar. Bu enjam X30 robot itine esaslanýar we meýdan şertlerinde işlemek üçin uýgunlaşdyrylan. Ony hakyky antilopa meňzetmek üçin tebigy sütük we haýwanyň skeleti ulanyldy.
Robot sürä ýakynlaşanda haýwanlaryň gyzyklanmasyny oýardy, ýöne olary ürküzmedi. Kem-kemden olaryň sürüsine goşulyp gitdi.
Alymlar çaga antilopanyň dünýä inmegi ýaly, üýtgeşik pursatlary surata düşüreris öýdüp umyt edipdiler, ýöne kamera diňe asuda otlap ýören süri düşdi.
Üç günüň dowamynda geçirilen synagda enjam eňňitlerden, çukurlardan we batgalyk ýerlerden geçip, takmynan 2 km ýoly külterledi we haýwanlary ýakyn aralykdan surata aldy.
Hakyky antilopalar ürkek jandarlar we 500-800 m aralykdan kimdir birini gördükleri derrew gaçmak bilen bolýarlar. Olara duşmak, hatda ene antilopany göwresindäki çagasynyň düşmekligi derejesine çenli ürküzip biler. Dronlar hem sürini tazykdyryp bilýärdi. Şonuň üçin ozal haýwanlary teleskoplar we güýçli kameralar arkaly synlamaly bolýardy.
