«Arkadag» we «Ahal» futbol klublary AFK-2 Çempionlar ligasynyň toparlaýyn tapgyrynyň bije çekişliginiň netijesinde garşydaşlaryny bildiler. Bu ýaryş Aziýanyň Çempionlar ligasyndan soň abraýy boýunça ikinji möhüm klub ýaryşydyr. Bäsleşik 16-njy sentýabrda başlanyp, indiki ýylyň 16-njy maýyna çenli dowam eder.
Futbol muşdaklarynyň umydyna garamazdan, ýaryşyň esasy ýyldyzy — Saud Arabystanynyň «Al-Nasr» toparynyň hüjümçisi Kriştianu Ronaldu Türkmenistana gelmez (iň bolmanda toparlaýyn tapgyrda). Onuň kluby D topara düşdi. Emma bu, türkmen muşdaklarynyň dünýä futbolynyň ýyldyzlaryny öz meýdançasynda görmäge mümkinçiliginiň bolmajakdygyny aňlatmaýar.
Sentýabrdan dekabra çenli geçiriljek toparlaýyn oýunlarda haýsy futbol ýyldyzlarynyň geljekdigini aýdýarys.
«Arkadag» FK-nyň garşydaşlary
Türkmenistanyň häzirki çempiony we AFK-nyň Çagyryş Ligasynyň ýeňijisi bolan «Arkadag» FK B topara düşdi. Bu toparda ol Kataryň «Al-Ahli», Özbegistanyň «Andijan» hem-de Bahreýniň «Al-Haldiýa» toparlaryna garşy oýnar.
Bu toparda ýeňşe esasy dalaşgär Doha şäherinden «Al-Ahli» hasaplanýar. Ol geçen möwsümi Kataryň Ýyldyzlar ligasynda dördünji ýerde tamamlady. Toparyň esasy ýyldyzy — dünýä çempiony bolan nemes hüjümçisi (2014) Ýulian Draksler. Ol karýerasynyň başynda «Pari Sen-Žermen» klubunda çykyş edipdi. Häzir ol 31 ýaşynda.
Özbegistanyň «Andijan» topary ýaryşa ýurduň Kubogyny alan topar hökmünde gatnaşýar. Bu toparyň esasy tanalýan adamy baş tälimçisi — Kiýewiň «Dinamo» klubunyň we Özbegistanyň milli ýygyndysynyň öňki futbolçysy Maksim Şatskih. Ol häzirki wagta çenli Ukrainanyň çempionatynyň taryhynda iň köp gol geçiren futbolçydyr (124 gol). Şatskih 1999-2011 ýyllar aralygynda milli ýygyndada çykyş edip, onuň kapitany bolupdy, şonuň üçin ol topary ruhlandyrmagy gowy bilýär.
«Al-Haldiýa» Bahreýniň Premýer ligasynda ikinji ýeri alyp, AFK-2 Ligasynda çykyş etmäge hukuk gazandy.
«Arkadag» FK oýun derejesinde bu toparlaryň hiç birinden pes däl we topardan çykmaga doly mümkinçilige eýe.
«Ahal» FK-nyň garşydaşlary
«Ahal» FK saýlama oýunlarynda Täjigistanyň «Regar-TadAZ» toparyny 2:1 hasabynda ýeňip, ýaryşa gatnaşmaga hukuk gazandy.
Bije çekilişde Türkmenistanyň wise-çempionyna belli bir derejede ýeňilräk garşydaş düşdi — C toparynda oňa Eýranyň «Sepahan», Iordaniýanyň «Al-Husseýn» we Hindistanyň «Mohun Bagan» toparlary garşy bolar.
«Sepahan» FK — Eýranyň wise-çempiony bolup, abraýly Lige çykmaga dalaş etdi, emma saýlama oýnunda Kataryň «Al-Duhail» toparyndan (2:3) ýeňildi. Isfahan şäheriniň bu kluby esasan ýerli futbolçylardan ybarat, daşary ýurtlular juda az. Az sanly kadadan çykmalaryň biri — «Portu» toparynyň terbiýesini alan, köplenç Ýewropanyň orta derejesindäki klublarynda oýnan Rikardu Alweşdir.
«Al-Husseýn» hem-de «Mohun Bagan Super Giant» (adynyň güýçlüligine garamazdan), milli çempionatlarynyň derejesi boýunça iň güýçli toparlardan hasaplanmaýar. Ýöne olaryň baý taryhy bar: «Al-Husseýn» 1950-nji ýylda döredilen bolsa, Kölkuttanyň «super-giantlaryna» eýýäm 136 ýyl bolupdyr — klub 1889-njy ýylda Günbatar Bengal welaýatynda döredilip, Aziýanyň iň köne futbol guramalarynyň biri hökmünde tanalýar.
