19-njy martda türkmen wekiliýetiniň Brýussele saparynyň çäklerinde Türkmenistanyň daşary işler ministri Raşid Meredow bilen Ýewropa Bileleşiginiň abraýly wekilleriniň arasynda birnäçe duşuşyk geçirildi.
ÝB-niň adam hukuklary boýunça ýörite wekili Olof Skug bilen geçirilen gepleşikleriň dowamynda taraplar Türkmenistan – ÝB Bilelikdäki komiteti we Adam hukuklary boýunça dialog ýaly ikitaraplaýyn hyzmatdaşlyk mehanizmleriniň ähmiýetini bellediler. Meredow Skuga Türkmenistanda ynsanperwer ugurda alnyp barylýan çäreler, şeýle-de ýurduň adam hukuklary babatynda halkara borçnamalarynyň ýerine ýetirilmegini üpjün etmek boýunça Pudagara komissiýasynyň işi barada habar berdi.
Şeýle-de, Meredow Ýewrokomissiýanyň ykdysadyýet boýunça ýerine ýetiriji wise-başlygy, söwda boýunça ýewrokomissar Waldis Dombrowskis, Ýewrokomissiýanyň wise-başlygy Margaritis Shinas, ÝB-niň halkara hyzmatdaşlyk boýunça ýewrokomissary Ýutta Urpilaýnen we Ýewroparlamentiň MA ýurtlary we Mongoliýa boýunça wekiliýetleriniň başlygy Tomaş Zdehowski bilen duşuşyklary geçirdi.
Taraplar Türkmenistan bilen ÝB-niň arasyndaky hyzmatdaşlyk meseleleriniň giň toplumyny, şol sanda ykdysadyýet, söwda, ynsanperwer gatnaşyklar, bilim, ylym, ýaşyl ykdysadyýet we howa taslamalary ýaly ugurlary ara alyp maslahatlaşdylar. Dowamly hyzmatdaşlygyň dinamikasy we geljegi bellenildi. Täze bilelikdäki taslamalary durmuşa geçirmäge gyzyklanma bildirildi.
