Teýlor Swift ýaly ýyldyzlaryň konsertleri diňe bir medeni çäre bolman, eýsem dürli ýurtlar üçin möhüm ykdysady faktordyr. Şeýlelik bilen, ykdysatçylar birinji çärýekde Singapuryň JIÖ-niň ösüşi baradaky çaklamany 2,9%-e çenli ýokarlandyrdylar we analitikler bu ösüşe ýardam edýän şertleriň biri hökmünde meşhur amerikaly aýdymçynyň “The Eras” konsert syýahatyny bellediler diýip, Bloomberg habar berýär.
Swiftiň Singapurda 2-nji martdan 9-njy mart aralygynda geçen alty konsertiniň ýurduň ykdysadyýetine, takmynan, 225-300 mln dollar ýa-da JIÖ-ne goşmaça 0,2% getirmegine garaşylýar. Bu serişdeler Swiftiň konsertine gelýän daşary ýurtly syýahatçylaryň köp bolmagy bilen baglanyşyklydyr diýip, DBS Bank-yň ykdysatçysy Çua Han Teng belleýär.
Singapur pop-ýyldyzyň täze albomyna bagyşlanan syýahata goşulan ýeke-täk Günorta-Gündogar Aziýa ýurdudyr.
“The Eras” giň gerimli syýahat bolup, onuň çäklerinde Teýlor Swift 151 konsert berer. Syýahat 2023-nji ýylyň mart aýynda başlady we 2024-nji ýylyň dekabr aýynda tamamlanar. Mundan öň “The Eras” taryhda iň girdejili syýahat hökmünde Ginnesiň rekordlar kitabyna girdi. 2023-nji ýylyň dekabr aýyna çenli ýagdaýa görä, onuň girdejisi 1,04 mlrd dollara barabar boldy.
