11-13-nji martda Aşgabat şäherinde Türki Döwletleriň Guramasynyň Ýaşulular geňeşiniň nobatdaky 15-nji mejlisi geçiriler. Mejlisiň barşynda guramanyň we geňeşiň işleri bilen baglanyşykly meseleler boýunça pikir alşylar.
Türki Döwletleriň Guramasynyň Ýaşulular geňeşiniň 14-nji mejlisi Özbegistanyň Samarkant şäherinde 2023-nji ýylyň oktýabr aýynda geçirilipdi.
Ýaşulular geňeşi Türki Döwletleriň Guramasynyň maslahat beriş edarasy bolup, gurama agza döwletleriň görnükli döwlet we jemgyýetçilik işgärlerinden düzülýär.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow 2022-nji ýylyň aprelinde Türki Döwletleriň Guramasynyň Ýaşulular geňeşiniň hormatly agzalygyna saýlandy.
Türki Döwletleriň Guramasynyň Ýaşulular geňeşiniň başlygy wezipesini Türkiýäniň ozalky Premýer-ministri Binali Ýyldyrym alyp barýar.
Belläp geçsek, türkmen halkynyň Milli Lideri ýakynda Türkiýä iş saparynyň çäklerinde Türkmenistanyň 2024-nji ýylda Türki Döwletleriň Guramasynyň doly hukukly agzasy bolup biljekdigi barada belledi.
