4-nji martda Aşgabada iş sapary bilen gelen Ýewropada Howpsuzlyk we Hyzmatdaşlyk Guramasynyň Baş sekretary Helga Şmid Türkmenistanyň Mejlisiniň binasynda milli parlamentiň ýolbaşçysy D.Gulmanowa hem-de Türkmenistanyň Zenanlar birleşiginiň Merkezi geňeşiniň, Kärdeşler arkalaşygynyň Milli merkeziniň başlygy A.Durdyýewa bilen duşuşdy. Bu barada Türkmenistanyň Mejlisiniň Metbugat gullugy habar berdi.
Duşuşygyň barşynda Mejlisiň Başlygy D.Gulmanowa halkara guramalar, şol sanda ÝHHG bilen köpýyllyk özara hyzmatdaşlygy ösdürmegiň Türkmenistanyň daşary syýasatynyň möhüm ugurlarynyň biridigini hem-de ÝHHG bilen hyzmatdaşlygyň ýylsaýyn täze ugurlar boýunça giňeldilýändigini belledi.
Söhbetdeşligiň barşynda myhman Türkmenistana bu gezekki saparynyň ÝHHG-niň Baş sekretarynyň we Merkezi Aziýa döwletleriniň daşky gurşawy goramak ministrleriniň ýokary derejeli duşuşygyna gatnaşmak bilen baglydygyny bellemek bilen, bu maslahatlaşmalaryň öňde durýan möhüm meseleleriň oňyn çözgütlerini tapmaga itergi berjekdigini aýtdy. Şeýle hem häzirki wagtda gender deňligini üpjün etmegiň, zenanlaryň mümkinçiliklerini artdyrmagyň ÝHHG-niň ileri tutulýan esasy ugurlarynyň biridigine ünsi çekmek bilen, bu ugurda kanunçylygy kämilleşdirmek bilen bagly tejribäni paýlaşmaga taýýardyklaryny beýan etdiler.
