2024-nji ýylyň 15 — 20-nji apreli aralygynda Türkmenistanda hokkeý boýunça halkara ýaryşy geçiriler. Ýaryşlar Aşgabat şäherindäki Gyşky oýunlar sport toplumynda geçiriler.
1-nji martda geçirilen Hökümet mejlisiniň barşynda Türkmenistanyň Prezidenti Serdar Berdimuhamedow Türkmenistanyň Bedenterbiýe we sport baradaky döwlet komitetine degişli ýaryşy geçirmäge ygtyýar berýän resminama gol çekdi.
Bellenilişi ýaly, bu ýaryş halklaryň arasynda dost-doganlygy, hoşniýetli goňşuçylygy has-da pugtalandyrmaga, bedenterbiýäni we sporty wagyz etmäge, jemgyýetimizde sagdyn durmuş ýörelgelerini işjeň ornaşdyrmaga, ösüp gelýän ýaş nesli sport bilen meşgullanmaga giňden çekmäge, şeýle hem ýurdumyzyň halkara sport abraýyny mundan beýläk-de belende götermäge ýardam eder.
