Ýakyn geljek Russiýanyň Tretýakow galereýasynyň sergi merkezinde Türkmenistanyň suratkeşleriniň we heýkeltaraşlarynyň eserleriniň sergisini guramak meýilleşdirilýär. Bu barada Türkmenistanyň Russiýa Federasiýasyndaky Adatdan daşary we Doly ygtyýarly ilçisi E.Aýdogdyýew bilen Treýtýakow galereýasynyň baş direktory Ý.W.Proniçewanyň arasynda geçirilen iş duşuşygynda bellenildi.
Türkmenistanyň DIM-niň habar bermegine görä, duşuşykda Türkmenistanyň ilçi türkmen halkynyň nusgawy şahyry, pelsepeçi we Gündogaryň akyldary Magtymguly Pyragynyň doglan gününiň 300 ýyllyk ýubileýine bagyşlanyp döwlet we halkara derejesinde uly çäreleriň geçirilýändigini nygtady.
Ara alyp maslahatlaşmalaryň esasy temasy, medeni we ynsanperwerlik pudagynda türkmen-rus hyzmatdaşlygynyň käbir taraplary, hususan-da, ýakyn geljek Tretýakow galereýasynyň sergi merkezinde Türkmenistanyň suratkeşleriniň we heýkeltaraşlarynyň eserleriniň sergisini guramak meselesi bilen bagly boldy.
Taraplar köp ýyllaryň dowamynda ýola goýulan dostluk we hoşniýetli goňşuçylyk däplerine esaslanýan netijeli gatnaşyklary işjeňleşdirmek baradaky özara gyzyklanmalaryny tassykladylar.
Tretýakow galereýasynyň sergi merkezinde Türkmenistanyň suratkeşleriniň we heýkeltaraşlarynyň eserleriniň sergisini 2026-njy ýylda guramak barada taraplar Tretýakow galereýasynyň we sungat pudagynda Türkmenistanyň ýöriteleşdirilen gurluşlarynyň hünärmenleriniň arasynda deslapky maslahatlaşmalary geçirmegiň zerurdygy barada ylalaşdylar.
