Türkmenistanda ýanwar aýynyň netijeleri boýunça jemi içerki önümiň ösüş depgini 6,3 göterime deň boldy. Şeýlelikde, milli ykdysadyýetimiziň pudaklarynda durnukly ösüş gazanyldy. Bu barada Prezident Serdar Berdimuhamedow milli ykdysadyýetimiziň pudaklarynyň şu ýylyň ýanwar aýynda alyp baran işleriniň jemlerine bagyşlap geçiren Hökümet mejlisinde belledi.
Geçen aýda maliýeleşdirmegiň ähli çeşmeleriniň hasabyna ýurdumyz boýunça özleşdirilen düýpli maýa goýumlarynyň möçberi
2 milliard 545 million manat boldy. Bu bolsa, geçen ýylyň degişli döwri bilen deňeşdireniňde 24,6 göterim köpdür. Munuň özi önümçilik kuwwatlyklaryny artdyrmaga şert döredýär diýip, Serdar Berdimuhamedow aýtdy.
Bu bolsa halkymyzyň ýaşaýyş-durmuş şertlerini has-da gowulandyrmaga hem-de sebitlerde goşmaça iş orunlaryny döretmäge mümkinçilik berer diýip, döwlet Baştutany nygtady.
Pudaklar we sebitler boýunça ýerine ýetirilmeli işler, amala aşyrylmaly çäreler we öňümizde durýan wezipeler köp diýip, Serdar Berdimuhamedow aýtdy we bu işleriň ýerine ýetirilişini hemişe berk gözegçilikde saklamagy tabşyrdy.
Serdar Berdimuhamedow sözüni dowam edip, 18-nji fewralda Türkmenistanyň diplomatik işgärleriniň gününiň bellenip geçiljekdigini aýtdy. Döwlet Baştutany Garaşsyz, Bitarap ýurdumyzyň diplomatik gullugynyň işgärleriniň öňde goýlan wezipeleri talabalaýyk ýerine ýetirmek ugrunda tutanýerli zähmet çekýändiklerini belledi hem-de ýurdumyzyň diplomatik gullugynyň ähli işgärlerini hünär baýramy bilen tüýs ýürekden gutlady.
