Wolton nesilşalygy “Forbes” žurnaly tarapyndan düzülen ABŞ-nyň iň baý maşgalalarynyň reýtinginde birinji orny eýeledi. Bu barada neşiriň saýtyna salgylanyp, TASS habar berýär.
Woltonlaryň maşgalasynyň baýlygy 267 mlrd dollar bilen bahalandyrylýar. Soňky onýyllykda nesilşalygyň wekilleri Walmart-yň, takmynan, 22 mlrd dollarlyk paýnamasyny satdylar hem-de 11 mlrd dollar peşgeş berdiler. Muňa garamazdan, maşgala agzalarynyň ýedisi henizem ownuk söwda ägirdiniň paýnamalarynyň, takmynan, 45%-ine eýeçilik edýär. Maşgalanyň baýlygyna ýedi sport kluby hem (şol sanda Lon Angeles Rams we Arsenal) öz goşandyny goşýar.
Reýtingde ikinji orny 117 mlrd dollar baýlyk bilen Mars maşgalasy eýeledi. Nesilşalyk Wirjiniýa ştatynyň Maklin şäherinde ýerleşýän dünýädäki iň uly konditer kompaniýasy Mars-yň eýesidir. Kompaniýanyň M&Ms, Snickers, Ben’s Original we Pedigree ýaly birnäçe meşhur brendi bar. 2022-nji ýylda onuň girdejisi 47 mlrd dollar boldy.
Liderleriň üçlügini baýlygy 116 mlrd dollar bolan Koh nesilşalygy jemledi. Çarlz Koh 1967-nji ýylda kakasy Fred aradan çykandan soň, 125 mlrd dollar (2022-nji ýyldaky satuw boýunça) bilen bahalandyrylýan Koch Industries konglomeratyna ýolbaşçylyk etdi. Çarlz we onuň dogany Dewidiň dul aýaly Juliýa Koh esasy paýnamalaryň 42%-ine eýeçilik edýär.
Şeýle-de, neşiriň reýtingine Kargill-Makmillan ($60,6 mlrd), Jonson ($44,8 mlrd, Edward Jonson – Fidelity Investments esaslandyryjysy), Prisker ($41,6 mlrd), Jonson ($38,5 mlrd, Semýuel Jonson – S.C.Johnson esaslandyryjysy), Keti ($33,6 mlrd), Dunkan ($30 mlrd), Koks ($26,8 mlrd) nesilşalyklary we beýlekiler girdi.
