Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş müdiriniň orunbasary Batyr Annaýew ÝB bilen Merkezi Aziýanyň arasyndaky durnukly ulag aragatnaşygy boýunça Belgiýanyň paýtagty Brýusselde geçirilýän Global Gateway maýa goýum forumynda ýurdumyzyň üstaşyr we ulag mümkinçilikleri barada gürrüň berdi. Bu barada Orient habar berýär.
Batyr Annaýew çärede çykyş etmek bilen, ýurdumyzyň Ýewropa bilen Aziýanyň arasynda möhüm ulag merkezine öwrülmäge mümkinçilik berýän ägirt uly potensialynyň bardygyny aýtdy. Hususan-da, Türkmenistanyň Hazar deňzinde häzirkizaman port infrastrukturasy bolup, onuň yklymda ýükleriň üstaşyr geçirilmegi üçin halkara geçelgesi hökmünde ähmiýeti barha artýar.
Şol bir wagtyň özünde, agentligiň baş müdiriniň orunbasary soňky ýyllarda ýurduň infastrukturanyň, şol sanda demirýollaryň, awtomobil, howa we deňiz ýollarynyň ösüşine işjeň maýa goýandygyny, munuň bolsa ýurduň üstaşyr potensialyny ep-esli artdyrandygyny belledi.
Şeýle-de, ulag pudagyna maýa goýumlaryň döwlet tarapyndan goldawynyň ygtybarly mehanizmleri döredildi. Daşary ýurt maýadarlary ýerli maýadarlar bilen deň hukuklara eýedir, olar kärhanalara eýeçilik edip we dolandyryp, hususylaşdyrmaga gatnaşyp we beýleki ýeňilliklerden peýdalanyp bilerler.
Merkezi Aziýa ýurtlaryndan geçýän ulag ýollary diňe bir durnukly we howpsuz gatnawlary ýola goýmak üçin uly mümkinçilikleri döretmän, eýsem Ýewropa kompaniýalary üçin maýa goýum mümkinçiliklerini-de döredýär diýip, Batyr Annaýew belledi.
Global Gateway Ýewropa, Merkezi Aziýa ýurtlaryndan we beýleki sebitlerden hökümet wekillerini, maliýe edaralaryny, işewür toparlary bir ýere jemledi. Foruma gatnaşyjylar Hazarüsti ulag geçelgesini Ýewropany we Merkezi Aziýany birleşdirýän multimodal we netijeli ugra öwürmek üçin zerur maýa goýumlary hem çäreleri ara alyp maslahatlaşýarlar.
