24-nji ýanwarda Türkmenistanyň Russiýa Federasiýasyndaky ilçisi Esen Aýdogdyýew we onuň bu ýurtdaky belarusly kärdeşi Dmitriý Krutoý Moskwada duşuşyk geçirdiler.
Türkmenistanyň diplomatik wekilhanasynyň habar bermegine görä, duşuşykda Türkmenistanyň we Belarus Respublikasynyň söwda-ykdysady hyzmatdaşlygynyň dürli meseleleri maslahatlaşyldy. Diplomatlar hususan-da, iki ýurduň birek-bireklerindäki söwda öýleriniň işi barada özara pikir alyşdylar.
Türkmenistan bilen Belarus Respublikasynyň arasynda, şol sanda GDA-nyň çäklerinde ýakyn wagtda geçirilmegi meýilleşdirilýän dürli derejedäki özara gepleşikleriniň tertbine hem garaldy. Demirgazyk - Günorta halkara ulag geçelgesini ösdürmegiň çäklerinde logistika düzümlerini kämilleşdirmegiň mümkinçiliklerine aýratynlykda garaldy.
Ýurtlaryň arasyndaky ynsanperwer gatnaşyklar ara alyp maslahatlaşmalaryň ýene-de bir esasy mazmuny boldy. Şunda türkmen talyplarynyň Belarusyň ýokary okuw mekdeplerinde okatmak mümkinçiliklerine hem üns çekildi.
