Germaniýanyň “Goetzpartners Emerging Markets GmbH” kompaniýasy Arkadag şäherinde azyk, senagat, derman we saglygy goraýyş maksatly serişdeleriň önümçilik zolagynda binalary we desgalary gurmak üçin maslahat beriş hyzmatlaryny ýerine ýetirer.
Degişli işleri geçirmek üçin Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetine Germaniýa Federatiw Respublikasynyň kompaniýasy bilen şertnama baglaşmaga ygtyýar berýän Karara Türkmenistanyň Prezidenti gol çekdi.
Bellenilişi ýaly, bu resminama “Arkadag şäherini ösdürmegiň meseleleri hakynda” Türkmenistanyň Prezidentiniň 2023-nji ýylyň 16-njy iýunynda çykaran 598-nji kararyny ýerine ýetirmek maksady bilen kabul edildi.
Belläp geçsek, Arkadag şäherinde lukmançylyk klasterini döretmek boýunça yglan edilen halkara bäsleşiginde GFR-iň “Goetzpartners Emerging Markets GmbH” maslahat beriş kompaniýasy ýeňiji boldy. 27-nji ýanwarda kompaniýanyň ýolbaşçylary Aşgabatda Türkmenistanyň Halk Maslahatynyň Başlygy Gurbanguly Berdimuhamedow bilen duşuşdylar. Duşuşygyň barşynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komiteti bilen GFR-iň “Goetzpartners Emerging Markets GmbH” maslahat beriş kompaniýasynyň arasynda özara düşünişmek hakynda Ähtnama gol çekildi.
