30-njy dekabrda Türkmenistanyň Halk Maslahatynyň Başlygy Gurbanguly Berdimuhamedow Arkadag şäheriniň köpugurly sport toplumynda täze şäheriň futbol toparynyň türgenleri we ýolbaşçylary bilen duşuşdy.
Duşuşygyň dowamynda Gurbanguly Berdimuhamedow täze toparyň futbolçylaryny gazanan ajaýyp ýeňişleri bilen gutlady hem-de olar bilen öňde durýan wezipeleri üstünlikli ýerine ýetirmegiň ugurlaryny ara alyp maslahatlaşdy.
Türkmen halkynyň Milli Lideri «Arkadag» futbol toparyna Türkmenistanyň Prezidentiniň sowgat beren awtobusyny synlap, onuň enjamlaşdyrylyşy, awtobusyň özboluşly bezeg aýratynlyklary bilen tanyşdy. Täze awtobusyň keşbinde futbol toparynyň nyşany, aýratyn-da, Arkadag şäheriniň baş bezegine we ady rowaýata öwrülen Akhan atly şöhratly bedewiň şekili ýerleşdirilipdir.
Belläp geçsek, «Arkadag» futbol topary futbol boýunça Türkmenistanyň çempiony bolup, şeýle hem final ýaryşynda ýeňiş gazanyp, Türkmenistanyň Kubogyna mynasyp boldy.
Gurbanguly Berdimuhamedow Köpugurly sport toplumynda «Arkadag» futbol toparynyň ähli türgenlerini, ýolbaşçylaryny gazanan ýeňişleri hem-de Täze ýyl baýramçylygy bilen gutlap, olara täze ýylda hem uly üstünlikler gazanmaklaryny arzuw etdi. Gurbanguly Berdimuhamedow uly ýeňşe mynasyp bolan futbolçylaryň türkmen sportunyň halkara giňişligindäki abraýynyň belende galmagyna mundan beýläk-de mynasyp goşant goşjakdyklaryna ynam bildirdi.
Gurbanguly Berdimuhamedow Türkmenistanyň Prezidentiniň ýakynda sanly ulgam arkaly geçiren iş maslahatynda täze toparyň futbolçylaryna ýadygärlik hökmünde futbol topuna gol çekip duran suratyny Arkadag şäheriniň futbolçylaryna sowgat gowşurdy we futbolçylaryň şu ýylky gazanan ýeňşiniň täze üstünlikleriniň başlangyjydygyny belledi.
“Arkadag” futbol toparynyň futbolçylary suraty çuňňur hoşallyk duýgulary bilen kabul edip, bu sowgadyň özlerini täze ýeňişlere ruhlandyrjakdygyny hem-de onuň toparyň muzeýiniň iň ähmiýetli gymmatlyklarynyň birine öwrüljekdigini uly buýsanç bilen nygtadylar.
Futbolçylar we toparyň ýolbaşçylary Gurbanguly Berdimuhamedowdan özleri bilen ýadygärlik surata düşmegini haýyş etdiler. Türkmen halkynyň Milli Lideri futbolçylaryň haýyşyny kanagatlandyryp, olar bilen ýadygärlik surata düşdi.
