Ýewropa Bileleşiginiň Türkmenistandaky ilçisi Beata Peska döwlet metbugatynda neşir edilen ýurduň raýatlaryna gönükdirilen Täze ýyl ýüzlenmesinde Brýusseliň Aşgabat bilen gatnaşyklary ähli ugurlarda giňeltmäge taýýardygyny belledi.
“Biz 2024-nji ýylda dürli ugurlarda Türkmenistan bilen gatnaşyklary mundan beýläk-de pugtalandyrmaga we giňeltmäge çalyşýarys. Dünýä üçin kyn bolan bu ýyly yzda galdyrmak bilen, biz ýüregimizde täze ýylyň bize parahatçylyk we adalatlylyk, rowaçlyk, üstünlik we täze öňegidişlikleri getirjekdigine bolan berk ynamy saklaýarys” – diýlip, habarda aýdylýar.
Ol Türkmenistan bilen Ýewropa Bileleşiginiň hyzmatdaşlygynda geçip barýan ýylda gazanylan üstünlikleri bellemek bilen, ýurduň “ÝB – Merkezi Aziýa” ministrler duşuşygyna gatnaşmagynyň möhümdigini aýratyn belläp geçdi hem-de 2024-nji ýylda şeýle formatdaky duşuşygy kabul etmäge taýýardygyna minnetdarlyk bildirdi.
2023-nji ýylda Türkmenistan bilen Ýewropa Bileleşigi diplomatik gatnaşyklaryň ýola goýulmagynyň 30 ýyllygyny belledi.
