2023-nji ýylyň on aýynda Türkmenistan bilen RF-iň arasyndaky özara haryt dolanyşygy fiziki aňlatmada 8% - 535 müň tonna çenli ýokarlandy. Russiýanyň eksporty 5,5%, Türkmenistandan import bolsa 21% ýokarlandy. Türkmenistandan Russiýa azyk harytlarynyň we oba hojalyk çig mallarynyň iberilişi 33%, himiýa senagat önümleriniň iberilişi bolsa 57% ýokarlandy. Bu barada Russiýanyň ykdysady ösüş ministriniň orunbasary Dmitriý Wolwaç ykdysady hyzmatdaşlyk boýunça Hökümetara Rus-Türkmen komissiýasynyň çäginde Söwda we maýa goýum goldawy boýunça ýokary derejeli toparyň 9-njy mejlisinde aýtdy. Bu barada ORIENT habar berýär.
Geçen hepde Moskwada geçirilen duşuşykda taraplar söwda-ykdysady hyzmatdaşlygy ösdürmegiň meselelerini, özara söwdany kämilleşdirmegiň şertlerini, senagat, energetika, gurluşyk hem-de bilim pudagyndaky bilelikdäki taslamalary ara alyp maslahatlaşdylar diýlip, RF-iň Ykdysady ösüş ministrliginiň saýtynda habar berilýär.
Duşuşyga gatnaşyjylar Russiýanyň eksport goldawy guramalarynyň rus we türkmen kompaniýalarynyň arasynda söwda we maýa goýum şertnamalaryny durmuşa geçirmekde maliýe we mäliýe däl goldaw çärelerini bermek mümkinçiliklerini seljerdiler, 2024-2026-njy ýyllar üçin Russiýanyň we Türkmenistanyň hökümetleriniň arasyndaky ykdysady hyzmatdaşlyk maksatnamasynyň taslamasyna seretdiler.
Wolwaçyň aýtmagyna görä, häzirki wagtda Russiýanyň Ykdysady ösüş ministrligi Türkmenistanyň çäginde Russiýanyň gatnaşmagyndaky 36 taslama gözegçilik edýär. Bulardan 11 taslama ulanylyşa bermek tapgyrynda, 21 taslama maýa goýum tapgyrynda, 10 taslama işjeň durmuşa geçiriş tapgyrynda. Mundan başga-da, dürli önümleriň üpjünçiligini guramak boýunça 15 taslama dürli taýýarlyk derejesindedir. Infrastruktura pudagynda 9 taslama durmuşa geçirilýär.
Ministriň orunbasary üstünlikli taslamalaryň arasynda Türkmenistanyň paýtagtynyň weýrançylykly sillerden doly goragyny we şäher gurmalarynyň dag suwlaryndan goragyny üpjün edýän desgalar toplumynyň gurluşygyny belläp geçdi. Nebitgaz pudagynda 3 taslama, senagat pudagynda 19 taslama durmuşa geçirilýär. Täze Arkadag şäheriniň gurluşygy üçin hem 300 müň tonnadan gowrak sozma önümleri bilen üpjün etmek barada şertnama baglaşyldy.
Şeýle-de, duşuşyga gatnaşyjylar 2024-nji ýylyň ýanwar aýynyň ahyrynda Aşgabatda geçiriljek ykdysady hyzmatdaşlyk boýunça Hökümetara Rus-Türkmen komissiýasynyň mejlisiniň gün tertibini ara alyp maslahatlaşdylar.
