Lloyds auksion öýi Awstraliýada baryp-ha geçen asyryň başynda berlen örän seýrek hasaba alnyş belgisini bäsleşikli söwda bilen satýar. NSW (Täze Günorta Uels) gysgaltmasy bolan we 1-lik san belgili ýazgy tagtasyna eýýäm ýerli dollarda 10 010 000 (takmynan, 6,7 million amerikan dollary) baha kesildi. Şunlukda, 27-nji ýanwara çenli belgi üçin söwdalaşyp bolýar we bahanyň ondanam galmagy mümkin.
Awstraliýada awtoulaglar üçin hasaba alnyş belgileri Beýik Britaniýanyň mysalynda 1910-njy ýylda berlip başlandy. Sandan çen tutsaň, satuwa çykarylan nusga NSW-niň ilkinji belgisi bolmaly: auksionçylar munuň polisiýanyň komissarynyň awtoulagyna berlendigini aýdýarlar.
Bu belgi soňra telekeçi Frederik Stýuarta degişli bolupdyr, ony 1961-nji ýyla çenli, ýagny dünýäden ötýänçä özi, soň bolsa dul aýaly Meýjori Stýuart ulanypdyr. Maglumata görä, ol bu nyşany 1988-nji ýylda 200 000 dollara satmak barada edilen teklipden ýüz öwrüpdir. Meýjori 2000-nji ýylda aradan çykdy, indi bolsa nyşan mirasdüşerleri tarapyndan satuwa çykarylýar.
Lloyds şular ýaly belgileriň, adatça, miras geçirilýänligi sebäpli, satuwa örän seýrek çykýandygyny belleýär. NSW 1 nyşany geçen asyryň başyndan bäri ilkinji gezek auksiona çykaryldy.
