Toyota kompaniýasy Awstraliýada Land Cruiser 300-iň gibrid görnüşini resmi taýdan tanyşdyrdy. Carscoops neşiriniň habar bermegine görä, mundan ozal iň kuwwatly Land Cruiser diňe Gündogar Ýewropanyň käbir ýurtlarynda we Ýakyn Gündogarda satylýardy.
Awstraliýaly alyjylara saýlamak üçin iki sany görnüş hödürlener — GR Sport we Sahara ZX. Olaryň ikisi hem i-Force Max gibrid ulgamy bilen enjamlaşdyrylandyr. Bu ulgama 3,5 litrlik iki turbonadduwly V6 hereketlendiriji we elektromotor girýär. Enjamyň umumy kuwwaty 457 at güýjüne, aýlaw pursaty bolsa 790 Nm-e deňdir. Bu görkezijiler adaty dizel hereketlendirijili Land Cruiser 300-den has ýokarydyr.
Awtoulag 10 basgançakly awtomatiki geçiriji guty we Toyota-nyň özboluşly doly çekiji ulgamy bilen üpjün edildi. GR Sport görnüşi, şeýle-de kämilleşdirilen podweska we differensiallaryň elektron blokirofkalary bilen tapawutlanýar.
Gibrid modeliniň aýratynlyklarynyň arasynda elektrikli rul güýçlendirijisi we salonyň yzky böleginde ýerleşýän 1500 Wt kuwwatly rozetka bar.
Gibrid Land Cruiser 300 diňe bäş orunlyk wariantda elýeterli bolar. Awstraliýada satuwlar 2026-njy ýylyň ortalarynda başlar.
GR Sport-uň bahasy 113 müň dollardan, Sahara ZX-iň bahasy bolsa 113,5 müň dollardan başlaýar. Bu bahalar V6 herketlendirijisi bolan meňzeş modellerden takmynan 6500 dollar gymmatdyr.
