Awstraliýanyň düzgünleşdiriji edaralary ýol hereketiniň düzgünlerini bozýan sürüş elementleriniň görkezilmegi sebäpli, Toyota GR Yaris modeliniň täze mahabat wideosyny ýaýlymdan aýyrmak barada karar çykardy. Häkimiýetleriň pikirine görä, wideoda görkezilýän tilsimler ýurduň islendik ştatynda hukuk bozulmasy hökmünde hasaplanardy.
Gözegçilik edaralary sürüjiniň tramplinden böküp, uçup barşyna burgerhanadan sargydyny alşy we soňra "Jimhana" (Gymkhana) stilindäki çylşyrymly tilsimleri ýerine ýetirýän sahnasyna şeýle reaksiýa bildirdiler. Toyota kompaniýasy bu sýužetiň doly toslama bolup, surata düşüriş işleriniň bolsa ýörite hünärmeniň gözegçiliginde, çäklendirilen ýapyk ýerlerde geçirilendigini düşündirdi. Kompaniýanyň wekilleri bu wideonyň diňe awtoulagyň tehniki mümkinçiliklerini görkezýändigini we sürüjileri düzgün bozmaga çagyrmaýandygyny öňe sürdüler.
Şeýle-de bolsa, düzgünleşdiriji edara awtokonserniň delillerini ret etdi. Muňa jogap hökmünde öndüriji wideony täzeden işlejekdigini wada berip, mahabatyň ýaýlymyny wagtlaýynça togtatdy.
Meňzeş waka 2021-nji ýylda hem bolupdy, emma şol wagt kompaniýa öz nukdaýnazaryny gorap, mahabat wideosyny ýaýlyma gaýtaryp getirmegi başarypdy.
