Awstraliýanyň mahabat standartlary boýunça geňeşi Toyota Hilux modeliniň täze wideosyny "kanuna garşy we howply hereketleri wagyz edýär" diýip hasaplady. CarExpert portalynyň habar bermegine görä, regulýatorlar wideonyň häzirki görnüşinde efire berilmegini bes etmegi talap etdiler.
Wideoda onlarça it, ýoldan geçip barýan Hilux-y görüp, öz eýelerini, gulluk ýerlerini we beýleki awtoulaglary taşlap, pikapyň yzyndan ylgap başlaýarlar. Soňra bolsa itler ulagyň kuzowyny doldurýarlar.
Sýužet boýunça Hilux öz bäsdeşlerinden - palçykda batyp galan Ford Ranger-den; ýokaryk zordan dyrmaşýan Mitsubishi Triton-dan; ýoluň gyrasynda ýatan Mazda BT-50-den "üstün çykyp" geçip gidýär.
Mahabatda bäsdeş markalaryň diňe köne nesilleriniň görkezilmegi hem ünsden düşmedi.
Mahabat standartlary baradaky komissiýa birnäçe şikaýat aldy:
"Mahabatda howply we potensial taýdan kanuna garşy hereketler görkezilýär. Itler howpsuzlyk üçin ýörite kemerlerde ýa-da gözenekli gaplarda daşalmalydyr. Käbir gulluk itleri üçin kadadan çykmalar bar bolsa-da, bu mahabat haýwanlary daşamagynyň jemgyýetçilik standartlaryna gabat gelmeýär."
Kompaniýanyň wekilleri wideonyň çişirilen görnüşde görkezilendigini we itleriň bu pikapa bolan "wepalylygyny" aňladýandygyny düşündirdiler. Şeýle-de, howply sahnalaryň kompýuter grafikasy (CGI) arkaly döredilendigini we hiç bir haýwanyň zeper çekmändigini bellediler. Muňa garamazdan, öndüriji wideony redaktirlemeli ýa-da efirden aýyrmaly bolar.
