Şu ýylyň 11 – 14-nji dekabrynda Türkmenistanyň Hindistan Respublikasyndaky ilçihanasynyň wekilleri ýokary okuw mekdepleriniň ýolbaşçylary we Hindistanyň Haýdarabat hem Puna şäherlerinde okaýan türkmen talyplary bilen duşuşdylar. Duşuşyga Türkmenistanyň ilçihanasynyň wekilleri, Osmaniýa uniwersitetiniň prorektory, Nizam kollejiniň müdiri, halkara gatnaşyklar bölüminiň müdiri we beýleki resmi şahslar gatnaşdy. Bu barada Türkmenistan Halkara Habarlar portaly habar berýär.
Duşuşykda ilçihananyň hormatly Prezidentimiziň daşary ýurtlarda okaýan talyplar baradaky aladasynyň esasynda türkmen talyplary bilen yzygiderli duşuşyklaryň guralýandygy bellenildi. Şeýle-de, Türkmenistan bilen Hindistanyň arasyndaky ikitaraplaýyn gatnaşyklar, ýurdumyzyň bilim ulgamynda alnyp barylýan özgertmeler barada gürrüň edildi.
Bellenilişi ýaly, 2023-nji ýylda Türkmenistanyň hemişelik Bitaraplygynyň 28 ýyllygy giňden bellenilip geçildi, şu ýylyň 4-nji dekabrynda bolsa Nýu-Delide “Magtymguly Pyragy we Gündogaryň medeni dünýäsi” atly ylmy-medeni konferensiýa geçirildi. Onuň dowamynda şahyryň hindi dilinde neşir edilen kitaby hödürlendi.
Duşuşykdan soň Haýdarabadyň we Punanyň talyplarynyň arasynda sport çäreleri geçirildi.
