Türkmenistan ilkinji gezek 5-nji dekabrda Tbiliside geçirilen TRACECA-nyň Hökümetara komissiýasynyň hemişelik sekretariatynyň mejlisine gatnaşdy. TRACECA-nyň Hökümetara komissiýasynyň hemişelik sekretariatynyň baş sekretary Aset Asawbaýew we beýleki agzalar Türkmenistany “Ýewropa – Kawkaz – Aziýa” ulag geçelgesini guramak boýunça Ýewropa Bileleşigi bilen hyzmatdaş ýurtlaryň arasyndaky halkara hyzmatdaşlyk maksatnamasyna goşulmagy bilen gutladylar. Bu barada Orient habar berýär.
Mejlisiň işine Türkmenistanyň Ministrler Kabinetiniň ýanyndaky Ulag we kommunikasiýalar agentliginiň baş müdiriniň orunbasary Batyr Annaýew gatnaşdy.
Mejlisiň dowamynda halkara hyzmatdaşlygyň möhüm meseleleri bilen bir hatarda 2016 – 2026-njy ýyllar üçin Ýewropa – Kawkaz – Aziýa halkara geçelgesini ösdürmek boýunça çäreleriň meýilnamasynyň ýerine ýetirilişi, TRACECA-nyň halkara şertnamalaryna goşulmak prosesi, halkara awtomobil gatnawlary üçin TRACECA-nyň rugsat ulgamynyň netijeleri we 2022-nji ýyl üçin TRACECA geçelgesiniň ugurlary arkaly ýük gatnawlarynyň statistikasy baradaky hasabat gözden geçirildi.
Şeýle-de, duşuşygyň gün tertibine Demir ýollarynyň hyzmatdaşlyk guramasy bilen TRACECA-nyň Hökümetara komissiýasynyň hemişelik sekretariatynyň arasyndaky hyzmatdaşlyk barada Ähtnamanyň taslamasyny ara alyp maslahatlaşmak, TRACECA-nyň Iş geňeşiniň esasy düzgünleri we TRACECA-nyň Hökümetara komissiýasynyň 17-nji ýyllyk mejlisini geçirmäge taýýarlyk işleri girdi.
