Lebap welaýatynyň Türkmenabat şäherinde «Türkmendemirýollary» agentliginiň hünär ýokarlandyryş okuwlaryny geçen owganystanly demirýolçularyň ikinji gutardyşy boldy. Mekdebiň uçurymlaryna degişli şahadatnamalar gowşuryldy diýip, ORIENT habar berdi.
Okuwlar 1-nji awgustdan 30-njy noýabr aralygynda dowam etdi. 1-nji dekabrda ýaş hünärmenler öz watanyna dolandylar.
Goňşy ýurtdan gelenler demirýol gurluşyk we wagonlary dolandyryş tehnologiýalaryny öwrendiler. Ikinji topar 14 adamdan ybarat boldy. 13 adamdan ybarat birinji topar Türkmenistanda 2023-nji ýylyň 16-njy ýanwaryndan 15-nji maý aralygynda okuw geçdi.
Dört aýlyk okuwlar 2021-nji ýylda “Türkmendemirýollary” agentligi we Owganystanyň Demirýol edarasy tarapyndan gol çekilen özara düşünişmek baradaky Ähtnama laýyklykda gurnaldy.
Şu günler Aşgabatda geçirilýän “Türkmendemirýollary” agentligi bilen Owganystanyň Demirýol edarasynyň ýolbaşçylarynyň arasyndaky gepleşiklerde Türkmenistan demirýol pudagy üçin has köp owgan talyplaryny okatmaga taýýardygyny mälim etdi. Hususan-da, hünäri ýokarlandyryş üçin üçünji topary Türkmenabada ibermegiň meseleleri ara alnyp maslahatlaşyldy.
