Türkmenistanyň Energetika ministriniň orunbasary S.Saparowyň ýolbaşçylygyndaky türkmen wekiliýeti 28–29-njy noýabrda Tbilisi şäherinde Gruziýanyň hökümetiniň Aziýa ösüş banky (ADB) bilen bilelikde guramagynda geçirilen «Merkezi Aziýa sebitleýin ykdysady hyzmatdaşlyk (CAREC)» maksatnamasynyň çäklerinde energetika ugry boýunça maýa goýum forumyna gatnaşdy.
Mejlisiň gün tertibine täze energetika taslamalary, sebitiň hödürleýän maýa goýum mümkinçiliklerini görkezmek, energetika netijeliligi we durnukly çözgütler, ýel we gidrodan bilen baglanyşykly beýleki birnäçe meseleler girizildi. Bu institut CAREC ýurtlarynyň taslamalarynyň arasyny baglanyşdyryjy hökmünde çykyş edip, sebitleýin ykdysady hyzmatdaşlygy goldamak boýunça syýasaty, maksatnamalary we taslamalary işläp taýýarlamakda hem-de amala aşyrmakda ylalaşygy üpjün edýär.
Türkmen wekiliýeti öz çykyşynda Türkmenistanyň energetika diplomatiýasyny ösdürmegiň 2021 — 2025-nji ýyllar üçin Maksatnamasynyň çäklerinde sebitde sarp edijileri energiýa serişdeleri bilen bökdençsiz we ygtybarly üpjün etmäge gönükdirilen syýasaty durmuşa geçirmek bilen, anyk taslamalaryň ençemesini amala aşyrýandygy barada belläp geçdi.
Türkmenistanyň energetika serişdeleriniň iberilýän möçberlerini artdyrmaga hem-de olaryň eksport ugurlaryny diwersifikasiýalaşdyrmaga gönükdirilen meýilnamalaryna we anyk hereketlerine CAREC maksatnamasyna gatnaşyjylar tarapyndan ýokary baha berilýär.
