Türkmenistanda Bilim ministrligi tarapyndan «Bilim işiniň döwlet akkreditasiýasy hakynda Düzgünnamanyň» taslamasy taýýarlanyldy. Bu barada «watan» habarlar gepleşiginde habar berildi.
Wise-premýer N.Amannepesowyň belleýşi ýaly, bu resminama «Bilim hakynda» Türkmenistanyň Kanunynyň 15-nji maddasyna laýyklykda taýýarlanyldy.
Ýurdumyzy durmuş-ykdysady taýdan ösdürmäge gönükdirilen Milli we Prezident maksatnamalarynda kesgitlenen wezipelere laýyklykda, bilim edaralaryny akkreditirlemegiň milli ulgamyny döretmek, ýokary hünär bilimi edaralarynyň halkara reýtingine goşulmagy üçin guramaçylyk işlerini alyp barmak meýilleşdirilýär.
Bilim işiniň döwlet akkreditasiýasynyň üstünlikli durmuşa geçirilmegi bilim edaralarynyň görkezijileri babatda dünýäde belli okuw mekdepleriniň sanawyna goşulmagyna, milli bilim ulgamynyň halkara derejelere çykarylmagyna ýardam eder.
Häzirki wagtda bu ugurda alnyp barylýan işleriň netijesinde ýurdumyzyň ýokary hünär bilimi edaralarynyň 9-sy Halkara uniwersitetler assosiasiýasynyň agzasy bolup durýar.
Myrat Garryýew adyndaky Türkmenistanyň Döwlet lukmançylyk uniwersiteti, Döwletmämmet Azady adyndaky Türkmen milli dünýä dilleri instituty hem-de Türkmen döwlet maliýe instituty Assosiasiýanyň agzalygyna kabul edilmek boýunça degişli guramaçylyk işlerini alyp barýarlar.
Döwlet Baştutany hasabaty diňläp, Garaşsyz ýurdumyzda ýaşlarymyzyň ylymly-bilimli, giň gözýetimli bolmagy ugrunda ýokary we orta hünär bilimi edaralarynda döwrebap özgertmeleriň durmuşa geçirilýändigini belledi. Şunuň bilen baglylykda, bilim işiniň döwlet akkreditasiýasynyň Düzgünnamasyny talabalaýyk taýýarlamak möhüm bolup durýar diýip, Serdar Berdimuhamedow aýtdy we wise-premýere bu ugurda degişli işleri geçirmegi tabşyrdy.
