140-dan gowrak döwletden liderleriň gatnaşmagynda Bütindünýä howa sammiti Dubaýda öz işine başlaýar. Bu barada TASS habar berýär. Sammitde BMG-niň howanyň üýtgemegi baradaky Çarçuwaly konwensiýasynyň taraplarynyň 28-nji konferensiýasynyň (COP28) başlygy we dünýäniň iň uly nebit öndürijileriniň biri hökmünde Birleşen Arap Emirlikleri halkara jemgyýetçiligini gazylyp alynýan ýangyçdan ýüz öwürmezden pes uglerodly geljegiň mümkindigine ynandyrmak isleýär.
Şu ýyl COP28-iň prezidenti bellenilen, BAE-niň senagat we ösen tehnologiýalar ministri wezipesini eýeleýän hem-de Abu-Dabiniň ADNOC milli nebit kompaniýasyna ýolbaşçylyk edýän Sultan ben Ahmed al-Jaber uglewodorodlaryň ulanylyşyny azaltmagyň jogapkärli çemeleşmäni talap edýändigini ençeme gezek aýdypdy. Al-Jaberiň pikiriçe, howanyň üýtgemegine garşy göreşde ileri tutulýan ugur uglerody tutmak, ulanmak we saklamak ýaly häzirkizaman tehnologiki çözgütlerden peýdalanmak bolmaly.
12-nji dekabra çenli dowam etjek konferensiýa günlerinde Dubaýyň dürli ýurtdan 70 müňden gowrak wekili, şol sanda döwlet baştutanlaryny, uly biznes we hökümete degişli däl guramalaryň wekillerini, şeýle-de gözlegçileri, hünärmenleri we žurnalistleri kabul etmegine garaşylýar. Bu taryhda BMG-niň howanyň üýtgemegi baradaky Çarçuwaly konwensiýasynyň taraplarynyň konferensiýasyna gatnaşyjylaryň iň köp sanydyr.
