Hytaý Haýnan adasynyň kenarynda maglumat saklaýyş we gaýtadan işleýiş merkeziniň birinji tapgyryny gurup başlady. Tom's Hardware portalynyň habaryna görä, iň döwrebap enjamlar bilen enjamlaşdyrylan birnäçe jebis konteýner deňziň düýbündäki ýörite meýdançada oturdylar. Gurluşygyň düýbüniň tutulyşy baradaky wideoýazgy Hytaýyň Merkezi telewideniýesinde (CCTV) görkezildi. Onda blogyň urganlar bilen deňiz platformasyndan suwuň aşagyna düşürilişi görkezilýär.
Dünýädäki ilkinji täjirçilik suwasty maglumatlary işleýiş merkezi Günorta-Hytaý deňziniň düýbünde ýerleşýär. CCTV-iň berýän maglumatlaryna görä, suw geçirmeýän jebis blok bölüminiň her bir 30 sekuntda dört milliondan gowrak ýokary durulykdaky suratlary gaýtadan işläp biler. Suwasty maglumat merkeziniň bir elementiniň güýji bir wagtyň özünde işleýän, takmynan, 60 müň adaty kompýuteriň öndürijiligine barabardyr.
Hytaý bäş ýylyň içinde şonuň ýaly ýüzlerçe blogy gurmagy meýilleşdirýär. Geljekde merkeziň kuwwaty 6 million adaty kompýutere deň bolar. Her bir maglumat saklaýjy blogyň agramy 1300 tonna - 1000 awtoulagyň agramyna deň. Modul 35 metr çuňluga deňziň düýbüne düşürilýär, munuň üçin üç sagat töweregi wagt gerek bolýar. Ammar desgasy azyndan çärýek asyr hyzmat etmeli; enjam tebigy hadysalara çydamly.
Suwasty maglumat merkeziniň esasy artykmaçlygy - energiýany ýokary derejede tygşytlap bilýänligi. Sowatmakda deňiz suwunyň ulanylýanlygy sebäpli, oňa hyzmat edilende çykdajylar ep-esli az bolar.
