26-27-nji noýabrda Aşgabatda ulag, üstaşyr we logistika meseleleri boýunça türkmen-gazak iş toparynyň birinji mejlisi geçirildi. Duşuşyga iki ýurduň degişli ministrlikleriniň we edaralarynyň wekilleri gatnaşdy diýip, Orient habar berýär.
Mejlisde türkmen tarapdan Ministrler Kabinetiniň ýanyndaky Ulag we kommunikasiýalar agentliginiň baş müdiriniň orunbasary Batyr Annaýew, gazak tarapdan ulag ministriniň orunbasary Talgat Lastaýew ýolbaşçylyk etdi.
Mejlisiň dowamynda awtomobil, demirýol we deňiz ulaglary babatynda ikitaraplaýyn gatnaşyklary pugtalandyrmak, logistika guramalaryna goldaw bermek meseleleri ara alnyp maslahatlaşyldy. Gepleşikleriň ahyrynda taraplar öz niýetlerini Türkmenistanyň Ministrler Kabinetiniň ýanyndaky Ulag we kommunikasiýalar agentligi bilen Gazagystan Respublikasynyň Ulag ministrligi tarapyndan gol çekilen ulag aragatnaşygy baradaky Ähtnamada berkitdiler.
Resminama Türkmenistanyň we Gazagystanyň çäkleri bilen gatnaw möçberini çekmek boýunça hyzmatdaşlygy giňeltmäge we höweslendirmäge gönükdirilendir. Şeýle-de, ulag pudagyndaky ygtyýarly döwlet edaralarynyň ygtyýarly wekillerinden hemişelik iş toparyny döretmek kararyna gelindi.
Duşuşyk ulag, üstaşyr we logistika meseleleri boýunça türkmen-gazak iş toparynyň ilkinji mejlisiniň beýanyna gol çekilmegi bilen tamamlandy.
Dialogy dowam etdirmek üçin mejlise gatnaşyjylar 2024-nji ýylda halkara awtomobil gatnawlary meseleleri boýunça türkmen-gazak komissiýasynyň nobatdaky mejlisini geçirmek barada ylalaşdylar. Bu bilelikdäki komissiýanyň geçenki mejlisi 2023-nji ýylyň 21-nji sentýabrynda Türkmenbaşy şäherinde geçirilipdi.
