Türkmenistanyň Kabuldaky ilçisi Hoja Öwezow Owganystanyň daşary işler ministri Amir Han Muttaki bilen duşuşdy.
Duşuşygyň dowamynda Owganystan bilen Türkmenistanyň arasyndaky ikitaraplaýyn gatnaşyklar ara alnyp maslahatlaşyldy we ykdysady meselelere hem-de iki ýurduň arasyndaky möhüm taslamalara aýratyn üns berildi diýip, Owganystanyň DIM-ine salgylanyp, Orient habar berýär.
Türkmenistan Owganystanda syýasy we sosial-ykdysady ýagdaýlary durnuklaşdyrmak boýunça halkara tagallalaryň çäginde işjeň iş alyp barýar, goňşy ýurda yzygiderli ynsanperwer kömegini iberýär, ol ýerde sosial desgalary gurýar, ilata lukmançylyk kömegini berýär, TOPH gaz geçirijisini, TOP elektrik geçiriji liniýasyny gurmak, demirýollary abatlamak, täze ýollary gurmak ýaly taslamalary durmuşa geçirmek arkaly ýurduň ykdysady taýdan dikelmegine ýardam edýär.
2017-nji ýylda, Aşgabatda gol çekilen degişli şertnama laýyklykda, Owganystan – Türkmenistan – Azerbaýjan – Gruziýa – Türkiýe ulag geçelgesi döredildi. Häzirki wagtda bu ulag magistralyny doly güýjünde işe girizmek üçin ähli tagallalar edilýär.
