Türkmenistanyň Prezidenti Serdar Berdimuhamedow Kuraş boýunça dünýä çempionatyna gatnaşyjylara Gutlag iberdi.
«Sizi myhmansöýer türkmen topragynda Halkara kuraş assosiasiýasy bilen özara hyzmatdaşlykda geçirilýän Kuraş boýunça dünýä çempionatynyň açylmagy mynasybetli tüýs ýürekden gutlaýaryn. Dünýäniň sport taryhynda möhüm waka bolan bu çempionatyň halkara sport hyzmatdaşlygyny pugtalandyrmaga, parahatçylygy we dostlugy dabaralandyrmaga, Olimpiýa hereketiniň ýörelgelerini wagyz etmäge hem-de ornaşdyrmaga, kuraş boýunça türgenleriň ussatlyklaryny, tejribelerini artdyrmaga uly goşant goşjakdygyna berk ynanýaryn» diýlip, Gutlagda aýdylýar.
«Beýik Ýüpek ýolunyň ýüregi bolan gadymy türkmen topragynda ýaşan ata-babalarymyz beden we ruhy taýdan sagdyn ýaş nesli terbiýelemekde göreşe aýratyn ähmiýet beripdirler. Şeýlelikde, toý-baýramlarda göreş tutýan ussat pälwanlary ýetişdirmegiň özboluşly milli göreş mekdebi kemala getirilipdir. Ata-babalarymyzdan miras galan türkmen milli göreşini çyn ýürekden söýen halkymyz ony asyrlarboýy kämilleşdirip, sungat derejesine ýetiripdir. Pälwanlary taýýarlamakdaky baý tejribesini Beýik Ýüpek ýoly boýunça dünýä ýaýradyp, göreşiň sport görnüşi hökmünde ösmegine uly goşant goşupdyr.
Biziň günlerimizde hem göreş sungaty milli gymmatlyk hökmünde yzygiderli kämilleşdirilýär we ýaýbaňlandyrylýar. Türkmen milli göreşi bilen bir hatarda, göreşiň beýleki görnüşlerine, şol sanda kuraş görnüşine hem uly üns berilýär. Ýurdumyzda Türkmenistanyň Kuraş federasiýasy hereket edýär. Türgenlerimiz kuraş boýunça halkara ýaryşlarda üstünlikli çykyş edip, eziz Watanymyzyň sport abraýyny mynasyp goraýarlar» diýip, Serdar Berdimuhamedow belleýär.
Kuraş boýunça dünýä çempionatynyň ýaryşlarynyň tertibi bilen şu salgydan tanşyp bilersiňiz.
