S.A.Nyýazow adyndaky Türkmen oba hojalyk uniwersiteti Türkmenistanyň we daşary ýurtlaryň ýokary okuw mekdepleriniň talyplarynyň arasynda Ekologiýa boýunça halkara II açyk internet-olimpiada geçirer.
Oňa gatnaşmaga höwes bildirýän talyplar ugruna, hünärine we ýokary okuw mekdeplerinde okaýan ýylyna garamazdan, olimpiada çagyrylýar.
Olimpiada şu ýylyň 5-nji dekabrynda şahsy bäsleşik görnüşinde geçiriler. Oňa gatnaşýanlara populýasiýa ekologiýasy we biosfera, adam ekologiýasy we häzirki zaman ekologiýa meseleleri, senagat ekologiýasy, ekologik gözegçilik, ekologiýa kanunçylygy we halkara guramalary ýaly ekologiýa ugurlaryndan meseleler teklip ediler. Oňa gatnaşýanlara meseleleri çözmek üçin 90 minut wagt berler. Olimpiada türkmen, rus we iňlis dillerinde geçiriler.
Bäsleşige gatnaşmak isleýänler S.A.Nyýazow adyndaky Türkmen oba hojalyk uniwersitetiniň resmi saýtynyň Olimpiada-2023 bölüminde «Gatnaşyjy» düwmesine basyp, bellige durmaly. Oňa gatnaşjaklar 3-nji dekabra çenli hasaba alnar. Şeýle hem olimpiada barada goşmaça maglumatlary uniwersitetiň saýtyndan tapyp bilersiňiz.
Olimpiada zehinli we ukyply talyplary ýüze çykarmaga, olary höweslendirmäge hem-de goldamaga, talyplaryň döredijilik başarnygyny, ylyma we ylmy barlaglara höwesini ýokarlandyrmaga, ýaşlaryň arasynda ekologiýa sowatlylygyny ösdürmäge, şeýle hem ylym we bilim pudagynda Türkmenistanyň we daşary ýurtlaryň ýokary okuw mekdepleriniň arasyndaky gatnaşyklary giňeltmäge gönükdirilendir.
