Prezident Serdar Berdimuhamedow BAE-li hyzmatdaşlary ýurdumyzda durmuşa geçirilýän halkara iri energetika taslamalaryna işjeň gatnaşmaga çagyrdy. Bu barada Prezident Serdar Berdimuhamedow Birleşen Arap Emirlikleriniň Energetika we infrastruktura ministri Suheýl Al Mazrui bilen geçiren duşuşygynda belledi.
Duşuşygyň dowamynda uzakmöhletli, özara bähbitli häsiýete eýe bolan döwletara hyzmatdaşlygyny mundan beýläk-de ösdürmegiň geljegi ara alnyp maslahatlaşyldy.
Bellenilişi ýaly, biziň ýurtlarymyz söwda-ykdysady we maliýe, ýangyç-energetika hem-de ulag-kommunikasiýa ulgamlarynda netijeli hyzmatdaşlyk edýärler. Ýangyç-energetika pudagynda Birleşen Arap Emirlikleriniň öňdebaryjy kompaniýalary bilen bilelikde iş alyp barmakda oňyn tejribe toplanyldy.
Baý tebigy serişdelere eýe bolan Türkmenistan bu netijeli hyzmatdaşlygy mundan beýläk-de ösdürmäge taýýardyr. Şunuň bilen baglylykda, Serdar Berdimuhamedow BAE-li hyzmatdaşlary ýurdumyzda durmuşa geçirilýän halkara iri energetika taslamalaryna işjeň gatnaşmaga çagyrdy. Şunda türkmen tarapynyň BAE-niň işewür düzümleriniň wekilleri bilen netijeli pikir alyşmaga hem-de olaryň anyk tekliplerine garamaga taýýardygy tassyklanyldy.
