Türkmenistan 2023-nji ýylyň dekabrynda Saud Arabystany Patyşalygynda geçirilmegi meýilleşdirilýän Halkara ykdysady forumyna hormatly myhman hökmünde çagyryldy. Bu barada ýurdumyzyň ýangyç-energetika toplumyna gözegçilik edýän wise-premýeriň Saud Arabystany Patyşalygynyň Maýa goýum ministri Halid Al Falih bilen sanly ulgam arkaly duşuşygynda bellenilip geçildi.
Duşuşygyň barşynda şol forumyň yzysüre Hökümetara toparynyň nobatdaky 7-nji mejlisini geçirmek teklip edildi. Bu meseleleriň ara alnyp maslahatlaşylmagy üçin ýakyn wagtda saud wekiliýetiniň Türkmenistana sapar bilen iberilmeginiň meýilleşdirilýändigi habar berildi.
Duşuşygyň barşynda Saud Arabystany Patyşalygynyň Maýa goýum ministri özüniň Söwda-ykdysady hyzmatdaşlyk boýunça bilelikdäki hökümetara türkmen-saud toparynyň saud böleginiň ýolbaşçysy bellenilendigini habar berdi.
Mundan başga-da, sanly ulgam arkaly geçirilen duşuşykda Saud Ösüş gaznasynyň hem-de Türkmenistanyň arasyndaky hyzmatdaşlygy pugtalandyrmak we giňeltmek maksady bilen, maýa goýum serişdelerini gönükdirmek ugrunda alnyp barylýan işler dogrusynda durlup geçildi.
