13-nji noýabrda Eýran Yslam Respublikasynyň Türkmenistanda täze bellenen Adatdan daşary we Doly ygtyýarly ilçisi Ali Mojtaba Ruzbehani Prezident Serdar Berdimuhamedowa ynanç hatyny gowşurdy.
Diplomat döwlet Baştutanyna hem-de türkmen halkynyň Milli Liderine Eýran Yslam Respublikasynyň Prezidenti Seýed Ebrahim Raisiniň mähirli salamyny we ähli türkmen halkyna parahatçylyk, abadançylyk, bagtyýarlyk we gülläp ösüş baradaky arzuwlaryny ýetirdi.
Işjeň we netijeli ýagdaýda geçen duşuşygyň dowamynda taraplar ikitaraplaýyn gatnaşyklaryň ileri tutulýan ugurlaryny ara alyp maslahatlaşdylar.
Şeýle hem Eýranyň ýurdumyzyň sebitdäki iň ähmiýetli hyzmatdaşlarynyň biri bolmagynda galýandygyna üns çekildi. Şunuň bilen baglylykda, söwda-ykdysady ulgamda deňhukuklylyk we özara bähbitlilik esasynda hyzmatdaşlygyň giňeldilmeginiň ykdysady döwletara gatnaşyklarynyň okgunly ösüşine laýyk gelýändigi bellenildi.
Söhbetdeşler özara gatnaşyklaryň ileri tutulýan ugurlarda oňyn ösdürilýändigini nygtap, ýangyç-energetika, ulag-kommunikasiýa toplumlarynda netijeli hyzmatdaşlygy çuňlaşdyrmaga, gurluşyk we oba hojalyk pudaklarynda dialogy dowam etdirmäge taýýardyklaryny tassykladylar. Bu işde Ykdysady hyzmatdaşlyk boýunça Hökümetara türkmen-eýran toparyna aýratyn orun degişlidir.
EYR-niň Adatdan daşary we Doly ygtyýarly ilçisi Ali Mojtaby Ruzbehani däp bolan dostlukly gatnaşyklary mundan beýläk-de yzygiderli çuňlaşdyrmak we hil taýdan täze ýokary derejä çykarmak üçin öz tarapyndan ähli tagallalary gaýgyrmajakdygyna ynandyrdy.
