Şweýsariýaly hünärmenleriň topary agyr Parkinson keseli bolan adamyň oňurga ýiligine çylşyrymly elektrod ulgamyny ornaşdyrdylar. Bu näsagyň ýene-de ýöremegine mümkinçilik berdi.
Mark atly 62 ýaşly fransuz 30 ýyl töweregi wagt bäri neýrodegeneratiw keselden ejir çekýärdi. Agyr Parkinson keseli bolan köp adam ýaly, ol hem hereket etmekde kynçylyk çekýärdi. Ulgamy oňurga ýiligine ornaşdyrmak işi Şweýsariýanyň Lozanna uniwersitetiniň goldamagynda Neýroreanimasiýa laboratoriýasyna ýolbaşçylyk edýän neýrohirurg Joslin Bloh we newrolog Gregor Kurtin tarapyndan geçirildi. Operasiýa üstünlikli geçdi we Mark bir nokatdan beýleki nokada özbaşdak hereket etmäge, gezelenç etmäge we dükanlara aýlanmaga başlady.
Munuň üçin oňurga ýiliginiň möhüm ýerlerine elektrodlar ulgamyndan ybarat neýroprostez ýerleşdirilýär. Enjam ýöremegi çaltlaşdyrmak üçin elektrik gyjyndyrmasy bilen üpjün edýär. Mundan başga-da, aýaklardaky kiçijik datçikler gyjyndyrmanyň güýjüni we dowamlylygyny sazlap, hereket niýetini göz öňünde tutmaga mümkinçilik berýär.
Mark iki ýyl bäri günde ortaça sekiz sagat neýroprostezi ulanýar. Alymlar indi tehnologiýanyň dürli adamlara nähili kömek edip biljekdigini görmek üçin Parkinson keseli bolan alty adamy operasiýa etmegi meýilleşdirýärler.
