Türkmenistanyň Belgiýadaky ilçisi Sapar Pälwanow “Diplomatic World” žurnalynyň prezidenti we esaslandyryjysy Barbara Ditrihe we taslama ýolbaşçysy Alberto Turkstra ygtyýarlandyryjy resminamany berdi. Bu resminama olary Türkmenistanyň Daşary işler ministrliginde ygtyýarlandyrylan daşary ýurt KHBS-iniň habarçylary hökmünde resmi taýdan ykrar edýär. Bu barada Orient habar berýär.
Bu waka Türkmenistan bilen abraýly neşiriň arasyndaky hzymatdaşlykda möhüm ähmiýete eýe bolup, ýurduň has işjeň maglumat we pikir alşygyna ýardam etmekde halkara köpçülikleýin habar beriş serişdeleri bilen aragatnaşyk saklamaga ygrarlydygyny görkezýär.
Türkmenistan bilen Brýusselde ýerleşýän abraýly “Diplomatic World” žurnalynyň arasyndaky gatnaşyklar 2022-nji ýylda žurnalyň ýolbaşçylygynyň Bitaraplyk güni mynasybetli Aşgabada gelmegi bilen hasam güýçlendi. Bu sapar we Belgiýada Türkmenistanyň diplomatik wekilhanasynyň žurnal bilen dowam edýän gatnaşygy media hyzmatdaşlygyny giňeltmäge ýardam berip, Türkmenistanda bolup geçýän soňky wakalary neşiriň soňky sanlarynda has giňişleýin beýan etmäge ýol açdy.
“Diplomatic World” žurnaly syýasat, diplomatiýa, işewürlik, maliýe, sungat we medeniýet ugurlaryny birleşdirýän platformadyr. Sanly we çap görnüşlerde her çärýek çykarylýan žurnal dürli ugurlarda çözgüt kabul edýän şahslaryň arasynda aýratyn baglanyşdyryjy halka bolup hyzmat edýär.
