29 – 31-nji oktýabrda Özbegistanda geçirilen Türkmenistanyň Medeniýet günleriniň çäklerinde Buhara şäherinde Türkmen halysynyň muzeýiniň hem-de haly dokalýan önümhananyň açylyş dabarasy boldy. Dabara Buharanyň resmi wekilleri, Türkmenistanyň wekiliýetiniň agzalary, haly dokamak boýunça ussatlar, türkmen-özbek medeni merkezleriniň, halk köpçüliginiň, dostluk jemgyýetleriniň wekilleri, köpçülikleýin habar beriş serişdeleriniň işgärleri gatnaşdy.
Halkymyzyň gadymdan gelýän milli senedi bolan halyçylyk sungatynyň barha ösýändiginiň, nepis türkmen halylarynyň bütin dünýäde şöhratynyň belende galýandygynyň subutnamasy bolan bu dabara köp sanly myhmanlary bir ýere jemledi. Bu ýerde myhmanlar muzeýiň we önümhananyň işi bilen tanyşdylar. Muzeýde türkmen haly önümçiliginiň taryhyna bagyşlanan eksponatlar, dürli reňkli we görnüşli halylar, şeýle-de haly dokamak boýunça gollanmalar hödürlenýär.
Açylyş dabarasynyň dowamynda medeniýet we sungat işgärleriniň joşgunly aýdym-sazlaryna giň gerim berilmegi, dabara gatnaşyjylaryň hoşallyk çykyşlarynyň ýaýbaňlandyrylmagy şatlyk-şowhuna, ýokary ruhubelentlige beslenip, dabarany ýatdan çykmajak pursatlara öwürdi.
