Şu ýylyň 14-16-njy noýabry aralygynda Aşgabatda «Bagtyýarlyk döwrüniň teatr sungaty» atly IV halkara festiwal geçiriler. Bu barada wise-premýer M.Mämmedowa Hökümet mejlisinde habar berdi.
Bu döredijilik forumyna Azerbaýjanyň döwlet sazly drama teatrynyň, Gazagystanyň drama teatrynyň, Gyrgyz Respublikasynyň sazly drama teatrynyň, Tatarystanyň döwlet akademiki teatrynyň, Täjigistanyň döwlet ýaşlar teatrynyň we Özbegistanyň sazly drama teatrynyň wekilleri gatnaşar.
Festiwalyň açylyş we ýapylyş dabaralary Türkmenistanyň Beýik Saparmyrat Türkmenbaşy adyndaky Baş akademiki drama teatrynda geçiriler. Aşgabat we Arkadag şäherinde ýurdumyzyň we daşary ýurtlaryň teatrlarynyň sahna oýunlaryny görkezmek meýilleşdirilýär.
Wise-premýer forumyň jemleri boýunça oňa gatnaşyjylary ýörite diplomlar, nyşanlar we ýadygärlik sowgatlar bilen sylaglamak dabarasynyň boljakdygyny aýdyp, döwlet Baştutanyna halkara festiwalyny geçirmegiň Meýilnamasyny, şeýle hem onuň nyşanynyň we teatr toparlaryna gowşuryljak nyşanyň teklip edilýän taslama görnüşlerini hödürledi.
Serdar Berdimuhamedow wise-premýere möhüm ähmiýetli bu halkara festiwalynyň ýokary guramaçylyk derejesini üpjün etmegi tabşyrdy.
