Prezident Serdar Berdimuhamedow Balkan welaýatynyň Türkmenbaşy etrabynyň çäginde kuwwatlylygy 1574 megawatt bolan, utgaşykly dolanyşykda işleýän täze, döwrebap elektrik stansiýasyny gurmak hakynda Karara gol çekdi. Degişli resminama döwlet Baştutany şenbe güni Hökümet mejlisiniň barşynda gol çekdi.
Mejlisiň barşynda wise-premýer B.Annamämmedowyň habar berşi ýaly, häzirki wagtda elektrik stansiýasynyň düýbüni tutmaga, şeýle hem ýurdumyzda bitewi halkalaýyn energetika ulgamyny kemala getirmegiň taslamasyny durmuşa geçirmegiň çäklerinde gurlan Mary-Ahal asma elektrik geçirijisini ulanmaga bermäge taýýarlyk görülýär.
Kuwwaty 1574 megawatta deň bolan täze elektrik stansiýasy ýurdumyzda ikinji uly gaz we bug dolanyşygynda işlejek elektrik desgasydyr.
