Anna güni Aşgabatda Halkara “Türkmen alabaý itleri” assosiasiýasynyň III mejlisi geçirildi. Türkmen alabaýynyň baýramçylygyna bagyşlanan foruma Assosiasiýanyň agzalary, ýöriteleşdirilen gurluşlaryň we ýokary okuw mekdepleriniň ýolbaşçylary we hünärmenleri gatnaşdy. Daşary ýurtly itşynaslar duşuşyga wideo aragatnaşyk arkaly goşuldylar.
Mejlisde hünärmenler türkmen alabaýlaryny dünýä tanatmak boýunça ýurtda alnyp barylýan giň gerimli işler, olary goramak we köpeltmek, şeýle-de populýasiýany saklamak barada gürrüň etdiler.
Olar öz çykyşlarynda tohumyň häzirki ýagdaýy barada maglumatlary ýygnamagyň we paýlaşmagyň möhümdigini bellediler. Tohumy köpeltmek, gorap saklamak we populýasiýanyň sanyny köpeltmek temalary ara alnyp maslahatlaşyldy. Şunuň bilen baglylykda, bilelikde dürli çäreleri – konferensiýalary, sergileri, bäsleşikleri, seminarlary, leksiýalary we “tegelek stol” görnüşinde duşuşyklary geçirmegiň zerurdygy bellenildi.
Forumda çykyş edenler türkmen we daşary ýurtly kärdeşleriň hyzmatdaşlygynyň genetik fondy gorap saklamak we geljekki nesiller üçin bu özboluşly itleriň arassa wekilleriniň sanyny artdyrmak boýunça işleriň netijeliligini ýokarlandyrmaga mümkinçilik berjekdigine ynam bildirdiler.
Türkmenistanyň Prezidentiniň Permany bilen türkmen alabaýynyň güni her ýyl oktýabr aýynyň soňky ýekşenbesinde bellenilýär.
