Türkmenistanda geçirilýän Tatarystan Respublikasynyň Medeniýet günleriniň çäklerinde paýtagtyň Şekillendiriş sungaty muzeýinde “Halkyň çeper döredijiligini we senetçiligini gorap saklamak, dikeltmek we ösdürmek” temasy boýunça tegelek stol geçirildi.
Medeni gepleşiklere Tatarystan Respublikasynyň ussatlarynyň we halk ussatlarynyň toparynyň agzalary, Türkmenistanyň Döwlet çeperçilik akademiýasynyň wekilleri, sungaty öwrenijiler hem-de at gazanan sungat işgärleri gatnaşdy.
Gepleşikler başlamazdan ozal myhmanlar türkmen halkynyň däp bolan senetleri bilen tanyşdylar. Türkmen zergärleriniň, halyçylarynyň we halk ussatlarynyň işlerini gyzyklanma bilen öwrenip, Tatarystan Respublikasynyň ussatlary türkmen kärdeşlerine tatar medeniýetiniň baý halk mirasynyň dessurlary boýunça döredilen önümlerini görkezdiler. Däp bolan egin-eşiklerdäki we el keşdesindäki käbir meňzeşliklere ünsi çekip, myhmanlar iki dostlukly halkyň – türkmenleriň we tatarlaryň – inçe ýüpek sapaklaryň nagyşlary bilen baglanyşandygyny bellediler.
Tatarystan Respublikasynda diňe bir döwlet däl, eýsem halk senetleriniň özboluşly ussahanalary hem işjeň ösdürilýär. Her ýyl Tatarystan Respublikasynyň hökümeti tarapyndan halkyň çeper döredijiligi pudagynda kiçi we orta telekeçiligiň subýektlerine goldaw bermek üçin grantlar berilýär.
Işgärleri taýýarlamak, halk döredijiliginiň we senetçiliginiň däp-dessurlaryny öwrenmek we ýaýratmak barada pikir alyşmak bilen, iki ýurduň wekilleri däp bolan halk senetlerini ösdürmek üçin barlygyň häzirkizaman formalarynyň we önümçilikde IT tehnologiýalaryny ulanmagyň zerurdygy baradaky netijä geldiler.
Duşuşygyň ahyrynda myhmanlar Türkmenistana gelip görmek mümkinçiligi, şeýle-de halk däp-dessurlarynyň hem senetleriniň goldanylýandygy we goralyp saklanýandygy üçin ýurdumyzyň hökümetine minnetdarlyk bildirdiler.
