Türkmenistanyň Fransiýadaky ilçisi Maksat Çaryýew respublikanyň Senatynyň “Merkezi Aziýa – Fransiýa” parlamentara toparynyň başlygy Erwe Moreý bilen duşuşyp, türkmen parlamentiniň wekiliýetiniň sapary bilen bagly meseläni maslahatlaşdy. Bu barada ýurduň Pariždäki ilçihanasyna salgylanyp, ORIENT habar berýär.
“Ikitaraplaýyn gatnaşyklar nukdaýnazaryndan türkmen tarapy hyzmatdaşlygyň mundan beýläk-de ösdürilmegine gyzyklanma bildirdi. Dürli çäreleri, şol sanda özara saparlary hem-de Türkmenistanyň Mejlisiniň wekiliýetiniň Fransiýa saparyny guramak pikirleri teklip edildi” – diýlip, Türkmenistanyň diplomatik wekilhanasynyň metbugat relizinde aýdylýar.
Senator türkmen tarapynyň teklibini uly höwes bilen kabul edip, Mejlisiň deputatlarynyň saparynyň Fransiýa Türkmenistandaky özgertmelere has gowy düşünmäge we baha bermäge, şeýle-de Aşgabat bilen Parižiň arasyndaky parlamentara gatnaşyklary ösdürmäge mümkinçilik berjekdigini belledi.
Türkmen diplomatlary Türkmenistanyň ýolbaşçylygy tarapyndan amala aşyrylýan özgertmeler hem-de ikitaraplaýyn gatnaşyklaryň geljegi barada giňişleýin gürrüň berdiler.
