Dünýäde ýoluň ýok ýerinde zarýad bermezden uzak aralygy geçmäge ukyply bolan ilkinji awtomobil hasaplanýan Gün batareýalarynda işleýän awtomobil Marokkonyň we Saharanyň üsti bilen 1000 km aralygy geçmek boýunça synagy üstünlikli tamamlady. Bu barada ferra.ru habar berýär.
Stella Terra diýlip atlandyrylan bu iki orunlyk awtomobil Eýndhowen Tehnologiýa uniwersitetiniň talyplary tarapyndan işlenip taýýarlandy. Üçekde oturdylan birnäçe Gün panellerinden alynýan energiýa bilen işleýän Stella Terra-nyň iň ýokary tizligi sagatda 145 km barabar, agramy bary-ýogy 1,2 tonna we güneşli günde ýol ätiýajy azyndan 710 km.
Solar Team Eindhoven toparynyň menejeri Wisse Bos awtomobilde ulanylýan tehnologiýanyň häzirki bazardan on ýyl öňde barýandygyny belleýär.
Awtomobilde az güneşli şertlerde, ýöne has gysga aralyga çenli işlemäge mümkinçilik berýän litiý-ion akkumulýatory oturdyldy.
Bu taslamanyň başynda duran talyplar işläp taýýarlamalarynyň has uly awtomobil kompaniýalaryny ekologiýa taýdan arassa ulag serişdelerini döretmäge ruhlandyrjakdygyna umyt bildirýärler.
