Türkmenistanyň günorta-gündogaryndaky Margiana arheologiki ekspedisiýasynyň dowamynda bürünç eýýamynyň iň gadymy artefaktlary tapyldy (bürünç asyry, takmynan, b.e. öňki 3300-nji ýyldan 1200-nji ýyla çenli taryhy döwür). Arheologlar gazuw-agtaryş işlerine gaýdyp gelmek bilen, koronawirus pandemiýasy sebäpli üç ýyllyk arakesmeden soň açyş etdiler. Bu barada ekspedisiýanyň ýolbaşçysy, Russiýanyň Ylymlar akademiýasynyň Etnologiýa we antropologiýa institutynyň baş ylmy işgäri Nadežda Dubowa salgylanyp, TASS habar berdi.
Arheologlar ýarym asyr bäri Garagum çölünde ýerleşýän Goňur-Depe şäherçesini öwrenýärler. Miladydan öňki 3-2 müňýyllyklarda, bürünç eýýamynda şol ýerde gadymy Marguş ýa-da Margiana gülläp ösüpdir. Indi bu ýerler köp sanly gadymy ýadygärlikleri bilen öwrenilmäge mynasyp gymmatly obýektdir.
Şeýlelik bilen, Margiana arheologiki ekspedisiýasyna gatnaşyjylar keramikanyň bölekleri çümdürilen mazarlaryň birinde syrly toýun topjagazlary tapdylar. “Biz ozal bu ýerden beýle topjagazlary asla tapyp görmändik. Topjagazlar belli bir tertipde durdular. Olar käbir däp-dessurlarda ulanylan bolsalar gerek, ýöne oýunlarda ulanylandyr diýip aýtmak gaty kyn "-diýip, Dubowa belledi .
Şeýle-de, gazuw-agtaryş işleriniň geçirilýän ýerinde syrça örtükli minerallardan ýasalan syrly konus şekilli zatlar hem tapyldy. Ekspedisiýanyň ýolbaşçysy arheologlaryň ozal beýle zatlary tapmandygyny aýtdy. Alymlaryň pikiriçe, bu şekiller oýunlar ýa-da çaklamalar we däp-dessurlar üçin ulanylan bolsalar gerek.
