Amerikanyň Tesla awtoulag öndürijisi uretan esasly öz-özüni dikeldýän gorag plýonkasyny hödürledi. Model 3-iň we Model Y-nyň eýeleri ony ulanyp bilerler.
TechCrunch -yň habar bermegine görä, Tesla-nyň täze önüminiň bahasy 7,5 müň dollardan 8 müň dollara çenli. Plýonka birnäçe reňkde hödürlenýär: gök, ýaşyl, tyllaýy, ak, gara, gyzyl we çal. Satylyş bahasy Tesla hyzmat merkezlerinde materiallary we gurnamalary öz içine alýar.
Awtoulag eýeleri awtoulagyny diňe bir zeperlerden goraman, eýsem awtoulagyň reňkini hem üýtgedip bilerler. 5000 dollarlyk dury plýonka awtoulagyňyzyň zawod reňkini gopmakdan we çyzylmalardan goraýar. Hyzmat diňe Tesla-nyň Günorta Kaliforniýadaky hyzmat merkezlerinde elýeterlidir. Ony gurnamak, ulag hyzmat merkezine tabşyrylandan soň, bäş-ýedi iş gününiň içinde amala aşyrylýar.
Awtoulag eýeleri plýonkany ulaglarynda köp wagt bäri ulanýarlar, ýöne Tesla bu hyzmaty satuwdan soňky hyzmat hökmünde hödürleýär. Plýonkany birnäçe sagadyň içinde ýelmäp bolýar, bu awtoulagyňyzyň daşky görnüşini üýtgetmegiň has arzan we aňsat usulydyr. Tesla düz reňkleri hödürleýär, ýöne üçünji tarapyň hyzmatlary plýonka islendik bezegi diýen ýaly çap edip biler.
Kompaniýa plýonkanyň öz-özüni dikeltmek häsiýetleriniň bardygyny we awtoulagyň kuzowyny gorap biljekdigini aýtdy. Örtük zaýalanan bolsa, eýesi onuň diňe zeper ýeten bölegini çalşyp biler.
