ABŞ-nyň Aeronawtika we kosmos giňişliginiň barlagy milli müdirligi (NASA) ilkinji gezek Bennu asteroidinden Osiris-rex zondynyň getiren materiýasynyň nusgalarynyň suratlaryny görkezdi.
Ýörite metbugat ýygnagynda müdirlik gara reňkli minerallary görkezdi. NASA-nyň müdiri Bill Nelsonyň habar bermegine görä, deslapky derňewler nusgalarda suwuň we uglerodyň bardygyny görkezdi. "Suwuň we uglerodyň molekulalary tapmak isleýän materiallarymyzdyr. Bular saýýarymyzyň emele gelmeginde örän möhüm elementlerdir. Olar [nusgalar] ýaşaýyşyň döremegine sebäp bolup biljek elementleriň gelip çykyşyny kesgitlemäge kömek eder" – diýip, NASA-nyň başlygy nygtady.
Osiris-rex gözleg kapsulasy missiýa başlandan ýedi ýyl soň, 24-nji sentýabrda Bennu asteroidinden alnan materiýanyň nusgalary bilen Ýere gaýdyp geldi. Ol synag syýahatynyň dowamynda takmynan 6,1 milliard km ýol geçdi. Osiris-rex Bennuwa golaýlamak we nusga ýygnamak missiýasynyň (1999 RQ36) çäginde 2016-njy ýylyň sentýabr aýynda orbitada üstünlikli işe girizildi. 2018-nji ýylyň dekabr aýynyň başynda asman jisimine ýetdi.
Zond 2020-nji ýylyň oktýabr aýynda Bennuwyň ýüzündäki Nightingale atly nokada üstünlikli gondy. NASA-nyň enjamy materiýanyň nusgalaryny ýygnady we bortdaky spektroskoplary, kameralary we beýleki ylmy gurallary ulanyp, asteroidiň gurluşyny we häsiýetlerini mümkin boldugyça jikme-jik öwrendi. 2021-nji ýylyň ýazynda Osiris-rex Bennuwyň orbitasyndan çykyp, Ýere tarap ugur aldy.
