Gyrgyzystan Türkmenistany möhüm ykdysady hyzmatdaşy hökmünde görmek bilen, söwda-ykdysady gatnaşyklary giňeltmäge we hil taýdan ösdürmäge aýratyn ähmiýet berýär. Bu barada Sadyr Žaparow Türkmenistanyň Prezidenti Serdar Berdimuhamedow bilen duşuşygynyň barşynda belledi. Bu barada gyrgyz Lideriniň Metbugat gullugy habar berýär.
Gyrgyz Lideri soňky iki ýylda özara haryt dolanyşygynyň artyp, ABŞ-nyň 82 mln dollaryna deň bolandygyny nygtady. Iki ýurduň işewür toparlarynyň arasyndaky gatnaşyklar hem işjeňleşdirildi. Netijede söwda-ykdysady gatnaşyklar depginli ösdürilýär. Muňa garamazdan, häzirki görkezijiler iki ýurduň ykdysady mümkinçiliklerine laýyk gelmeýär.
Sadyr Žaparow gyrgyz tarapynyň Türkmenistan bilen hyzmatdaşlygyny mundan beýläk hem giňeltmäge gyzyklanma bildirýändigini mälim etdi.
Öz gezeginde, Serdar Berdimuhamedow iki ýurduň özara haryt dolanyşygynyň artmagyny kanagatlanma bilen belläp, bu depgini dowam edip, ony mundan beýläk hem ösdürmek üçin täze mümkinçilikleri gözlemegiň zerurdygyny nygtady.
