Aşgabat şäherinde 2023-nji ýylyň 29-njy oktýabrynda Türkmen alabaýynyň baýramy mynasybetli “Ýylyň türkmen edermen alabaýy” atly halkara bäsleşigi geçiriler. Degişli Buýruga Türkmenistanyň Prezidenti gol çekdi.
Şeýle hem resminama laýyklykda, halyçylaryň, suratkeşleriň, heýkeltaraşlaryň, fotosuratçylaryň, neşirýat işgärleriniň we teleoperatorlaryň arasynda türkmen alabaý itleriniň daşky keşbini şekillendiriş we amaly-haşam sungaty eserlerinde, neşir önümlerinde, fotosuratlarda, teleýaýlymlarda çeper beýan etmek ugrunda bäsleşikler geçiriler. Bäsleşikleri geçirmek boýunça eminler toparynyň düzümi tassyklanyldy.
Türkmen alabaýynyň baýramy Türkmenistanda 2022-nji ýyldan bäri oktýabryň soňky ýekşenbesinde bellenilip geçilýär.
