Aşgabatda geçirilen “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara serginiň we ylmy konferensiýanyň çäklerinde Russiýanyň ýokary okuw mekdepleriniň wekilleri Magtymguly adyndaky Türkmen döwlet uniwersitetine baryp gördüler. Bu barada ýokary okuw mekdebiniň saýty habar berýär.
Geografiýa ylymlarynyň doktory, M.W.Lomonosow adyndaky Moskwa döwlet uniwersitetiniň tebigaty oýlanyşykly peýdalanma kafedrasynyň professory Ýuriý Mazurow, MDU-nyň himiýa fakultetiniň fiziki himiýa kafedrasynyň dosenti, pedagogika ylymlarynyň kandidaty Oksana Ryžowa, şeýle-de W.N.Tatişew adyndaky Astrahan döwlet uniwersitetiniň halkara işleri boýunça prorektory Angelina Fadina ÝUNESKO “Medeni miras: geçmişden geljege” kafedrasyna baryp gördüler.
ÝUNESKO kafedrasynyň agzalary bilen duşuşyk “sorag-jogap” görnüşinde geçirildi. Şeýle-de, russiýaly alymlar ýokary okuw mekdebiniň talyplary üçin leksiýa kursuny geçirdiler. Leksiýalarda talyplarda kognitiw başarnyklaryň ösüşi, himiýany okatmagyň usulyýetiniň häzirkizaman taraplary we Durnukly ösüş maksatlaryna ýetmekde bilimiň esasy taraplary barada gürrüň edildi.
Magtymguly adyndaky TDU-nyň ýardam etmeginde hyzmatdaş ýokary okuw mekdeplerinden gelen daşary ýurtly kärdeşler “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara konferensiýa we “Gündogaryň meşhur akyldary we lukmany Abu Aly ibn Sinanyň umumadamzat ähmiýetli mirasy” atly halkara ylmy konferensiýa gatnaşdylar. Bulardan başga-da, ylmy konferensiýa Pekiniň daşary ýurt dilleri uniwersitetiniň (HHR) we Ýerewan döwlet uniwersitetiniň (Ermenistan Respublikasy) wekilleri gatnaşýar.
