Meta amerikan kompaniýasy her ýyl geçirilýän Connect konferensiýasynda Instagram, Facebook we WhatsApp önümleri üçin emeli intellekte (EI) esaslanýan çat-boty anons etdi. Bu barada Financial Times habar berýär diýip, Interfax.ru belleýär.
Bot Microsoft-dan Bing gözleg ulgamynyň kömegi bilen soraglara jogap gözläp biler we görkezilen parametrlere laýyklykda ol ýa-da beýleki bir şekili döredip biler.
Şeýle-de, ulanyja öz keşpleriniň we sesleriniň ulanylmagyna razy bolan dürli meşhur adamlaryň – aýratynam, türgenleriň, sazandalaryň we wideo blogerleriniň wirtual nusgalary bolan 28 sany özboluşly EI-kömekçisinden saýlama elýeterli bolar.
Mundan başga-da, Meta işläp düzüjilere Instagram-a, Facebook-a we WhatsApp-a soňraky integrasiýa üçin hususy çat-botlaryny döretmäge mümkinçilik berjekdigini habar berdi.
Şeýlelik bilen, kompaniýa bu platformalaryň çäklerinde ulanyjylaryň gatnaşygyny artdyrmaga we generatiw emeli intellektiň okgunly ösüşinden peýda almaga çalyşýar.
Çat-botdan başga-da, Meta Apple-den Vision Pro gurluşy bilen bäsleşjek wirtual we üsti ýetirilen hakykat garniturasy Quest 3-i hödürledi. 499,99 dollar bahaly täze gurluş oktýabrda satuwa çykarylar.
Konferensiýanyň ýene bir wakasy indi Instagram-da we Facebook-da göni ýaýlymy alyp barmaga mümkinçilik berýän indiki nesliň Ray-Ban Meta Smart Glasses äýnekleri boldy. Öňki wersiýalar ýaly, täze model fotosuratlary düşürip we wideorolikleri ýazyp bilýär. Akylly äýnekleriň bahasy 299 dollardan başlaýar.
